სიახლე 
2019-04-30 10:51:05
6 მაისიდან პირველი ქართული ეროვნული საფოსტო მარკის 100 წლის იუბილესადმი მიძღვნილი მონეტის რეალიზაცია დაიწყება
1919 წლის 26 მაისს, საქართველოს დემოკრატიული რესპუბლიკის დაარსების პირველი წლისთავის აღსანიშნავად, მიმოქცევაში გამოვიდა პირველი ქართული ეროვნული საფოსტო მარკა 10 კაპეიკის ნომინალით.


მონეტის ავერსის მთავარ კომპოზიციას წარმოადგენს 1919 წელს გამოცემული 10 კაპეიკის ნომინალის პირველი ქართული საფოსტო მარკა და ასევე, ამავე სერიის კიდევ  ოთხი ნომინალის (40კ; 50კ; 60კ; 70კ) მარკის ფრაგმენტი, რომლებიც ერთმანეთისგან გამოყოფილია ინკრუსტირებული კიდეებით.

მონეტის რევერსის მთავარ კომპოზიციას წარმოადგენს დალუქული კონვერტი, როგორც გზავნილი საქართველოდან მსოფლიოს ნებისმიერ წერტილში და ასევე, წერტილებით სტილიზებული მსოფლიო რუქა. კონვერტის ლუქის ბეჭედზე გამოსახულია ნომინალის აღმნიშვნელი ციფრი ლარის სიმბოლოსთან ერთად „5₾“. მონეტაზე დატანილია, ასევე, წარწერები „საქართველო“, „Georgia“;„1919 – 2019“, „5 ლარი“.

მონეტის ტექნიკური მახასიათებლები:

ნომინალი: 5 ლარი
შემადგენლობა: Ag925
წონა: 15.5გრ
დიამეტრი: 33X27 მმ 
წიბო: გლუვი
ხარისხი: პრუფი
მოჭრის რაოდენობა: 1500 ცალი
გამოშვების წელი: 2019 წელი
მონეტის დიზაინის ავტორი: ნიტა გონგაძე
ზარაფხანა: პოლონეთის ზარაფხანა

მონეტის რეალიზაცია მიმდინარე წლის 6 მაისიდან  დაიწყება.

სარეალიზაციო ფასი 90 ლარია.

მონეტების შეძენა შესაძლებელი იქნება, როგორც ეროვნული ბანკის საკასო ცენტრსა და ყვარლის ფულის მუზეუმში, ისე ეროვნული ბანკის ვებგვერდზე განთავსებული ინტერნეტ მაღაზიის მეშვეობით.

იმისათვის, რომ მონეტის შეძენა შეძლოს მაქსიმალურად ბევრმა კოლექციონერმა,  ეროვნული ბანკის გადაწყვეტილებით, პირველი 5 დღის განმავლობაში დაწესდება შეზღუდვა - ერთ მომხმარებელს შეეძლება იყიდოს არაუმეტეს ორი მონეტისა. მონეტის შეძენისას გთხოვთ თან იქონიოთ პირადობის დამადასტურებელი დოკუმენტი.