სიახლე 
2021-03-26 12:08:00
1 აპრილიდან ეროვნული ბანკი ზაფხულის ოლიმპიური თამაშებისადმი მიძღვნილი საკოლექციო მონეტის რეალიზაციას დაიწყებს
საქართველოს ეროვნულმა ბანკმა ზაფხულის ოლიმპიური თამაშებისადმი მიძღვნილი საკოლექციო დანიშნულების 5 ლარის ნომინალის ვერცხლის მონეტა გამოუშვა.  2020 წლის ზაფხულის ოლიმპიური თამაშები ტოკიოში უნდა გამართულიყო. თუმცა, მსოფლიოში პანდემიით (Covid-19) გამოწვეული ვითარების გამო, საერთაშორისო ოლიმპიურმა კომიტეტმა ოლიმპიური თამაშების 2021 წლის ზაფხულში გადატანა გადაწყვიტა. აღსანიშნავია, რომ ღონისძიების სახელწოდება - „ტოკიო 2020“ უცვლელი დარჩა.
ზაფხულის ოლიმპიური თამაშები 1896 წლიდან 4 წელიწადში ერთხელ იმართება და სპორტის 30-ზე მეტ სახეობას მოიცავს. მათ შორისაა, მძლეოსნობა, ჭიდაობა, ძალოსნობა, ძიუდო, ჩოგბურთი, კალათბურთი, ცურვა, ტანვარჯიში, ფარიკაობა და ა.შ.

საქართველოს სპორტის ოლიმპიური ისტორია XX საუკუნის 50-იანი წლებიდან იწყება. წინა წლების ოლიმპიადებისა და შემდგომ, დიდ საერთაშორისო ასპარეზობებზე სპორტსმენთა მიერ მიღწეული შედეგების გათვალისწინებით, იმედს ვიტოვებთ, რომ საქართველოს წარმომადგენლები მომავალ ოლიმპიურ თამაშებზეც წარმატებებს  მიაღწევენ.


საკოლექციო მონეტის ესკიზი ღია კონკურსის წესით შეირჩა. მონეტის დიზაინი ივა ჯანეზაშვილს ეკუთვნის. მონეტა ნიდერლანდების სამეფო ზარაფხანაში 1500-იანი ტირაჟით მოიჭრა. მონეტის ფასი 80 ლარია და მისი შეძენა 2021 წლის პირველი აპრილის 10:00 საათიდან საქართველოს ეროვნული ბანკის ონლაინ მაღაზიის საშუალებით, ასევე,  საკასო ცენტრსა (თბილისი, კახეთის გზატკეცილი 72-ე კმ.) და ფულის მუზეუმში (ყვარელი, შოთა რუსთაველის N10) იქნება შესაძლებელი. (გთხოვთ გაითვალისწინოთ, რომ, ახალი პროდუქციის  გამოსვლასთან დაკავშირებით, გაზრდილი მოთხოვნის არსებობის შემთხვევაში, ონლაინ მაღაზიის მეშვეობით განთავსებული შეკვეთის მიწოდების ვადა დამატებით შესაძლოა გაიზარდოს).


პროდუქცია 2021 წლის პირველი აპრილიდან 5 დღის განმავლობაში ლიმიტირებულად გაიყიდება - ერთ მომხმარებელს არაუმეტეს ორი მონეტის შეძენა შეეძლება, რათა მეტი კოლექციონერისთვის გახდეს ხელმისაწვდომი. მონეტის შეძენისას გთხოვთ თან იქონიოთ პირადობის დამადასტურებელი დოკუმენტი.


მონეტის ავერსის მთავარ კომპოზიციას წარმოადგენს ტოკიოს მთავარი ოლიმპიური არენის არქიტექტურის სტილიზებული გრაფიკული გამოსახულება. არენის შიდა ნაწილში გამოსახულია საქართველოს  მოფრიალე დროშა. მონეტის ცენტრალურ მარჯვენა ნაწილში განთავსებულია საქართველოს ეროვნული ოლიმპიური კომიტეტის ლოგო. წრიულ რკალში კი დატანილია წარწერები „NATIONAL OLYMPIC TEAM OF GEORGIA” და „ზაფხულის ოლიმპიური თამაშები“.


მონეტის რევერსის  მთავარ კომპოზიციას წარმოადგენს სპორტული მარათონის სარბენი ბილიკის სტილიზებული  გამოსახულება.  დატანილია წარწერები: „5 ლარი“,   ოლიმპიადის სლოგანი „DISCOVER TOMORROW” და „SUMMER OLYMPIC GAMES IN JAPAN”. ხოლო ქვედა არასტანდარტულ რკალში კი განთავსებულია ფარული გამოსახულება, რომელზეც მონეტის განსხვავებული კუთხით დახრისას მონაცვლეობით ჩნდება წლები „2020“ და „2021“. 
 
ნომინალი: 5 ლარი 
შემადგენლობა: Ag925
წონა: 15.5 გრ 
დიამეტრი: 33 მმ
წიბო: გლუვი
ხარისხი: პრუფი
გამოშვების წელი: 2020
მოჭრის რაოდენობა: 1500 ცალი
დიზაინერი: ივა ჯანეზაშვილი



საქართველოს ეროვნული ბანკი მადლობას უხდის საქართველოს ეროვნულ ოლიმპიურ კომიტეტს მონეტის დიზაინში გამოყენებულ ლოგოსა და წარწერებთან დაკავშირებით გაწეული დახმარებისათვის.